പെട്രോൾ പമ്പിൽ നിന്ന് ഒന്നരലക്ഷം രൂപ മോഷ്ടിച്ചു; സംഭവം തിരുവനന്തപുരത്ത്

തിരുവനന്തപുരം: നഗരത്തിൽ പാളയത്തെ പെട്രോൾ പമ്പിൽ മോഷണം. പമ്പിലെ ഓഫീസിൽ കടന്നുകയറിയ മോഷ്ടാവ് ഒന്നര ലക്ഷം രൂപയുമായി ഓടിരക്ഷപ്പെടുകയായിരുന്നു.

ഇന്ന് പുലർച്ചെയാണ് സംഭവം. മുൻപും ഇതേ പമ്പിൽ മോഷണം നടന്നിട്ടുണ്ട്. സിസിടിവി ദൃശ്യങ്ങളനുസരിച്ച് ഇന്ന് മോഷണ സമയത്ത് പമ്പിൽ ഒരു ജീവനക്കാരൻ മാത്രമാണ് ഉണ്ടായിരുന്നത്. ഇയാളുടെ കണ്ണുവെട്ടിച്ചാണ് മൂന്ന് ദിവസത്തെ കളക്ഷൻ തുകയായ ഒന്നര ലക്ഷം രൂപ തട്ടിയെടുത്ത് മോഷ്ടാവ് ഓടിപ്പോയത്. മുൻപ് ഇവിടെ മോഷണം നടത്തിയയാൾ തന്നെയാണോ ഇത്തവണയും മോഷണം നടത്തിയത് എന്നതടക്കം കാര്യങ്ങളിൽ അന്വേഷണം ആരംഭിച്ചിട്ടുണ്ട്. സംഭവമറിഞ്ഞയുടൻ വിരലടയാള വിദഗ്ധരടക്കം എത്തി തെളിവുകൾ ശേഖരിച്ചു. മ്യൂസിയം പൊലീസാണ് അന്വേഷണം നടത്തുന്നത്.