സൗദി അറേബ്യ. റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെയുണ്ടായ ആക്രമണത്തില്‍ ഒരു സൗദി പൈലറ്റ് ഉള്‍പ്പെടെ മൂന്ന് പേർ കൊല്ലപ്പെട്ടു. സൗദിയ എയർലൈൻസിന്റെ വിമാനത്തിനും വിമാനത്താവള സൗകര്യങ്ങള്‍ക്കും ആക്രമണത്തില്‍ കേടുപാടുകള്‍ സംഭവിച്ചതായി സൗദി സിവില്‍ ഏവിയേഷൻ അതോറിറ്റി അറിയിച്ചു. യെമനിലെ ഇറാൻ പിന്തുണയുള്ള ഹൂതി വിമതരാണ് ആക്രമണത്തിന് പിന്നില്‍. വ്യാഴാഴ്ച നടന്ന ആക്രമണത്തെ തുടർന്ന് വിമാനത്താവളത്തിലെ പ്രവർത്തനങ്ങള്‍ താല്‍ക്കാലികമായി തടസ്സപ്പെട്ടിരുന്നെങ്കിലും, നിലവില്‍ വ്യോമഗതാഗതം സാധാരണ നിലയിലായതായി അധികൃതർ വ്യക്തമാക്കി.
ഒക്ടോബർ 6, 7 തീയതികളിലായി അബഹ അന്താരാഷ്ട്ര വിമാനത്താവളത്തിലും കിംഗ് ഖാലിദ് വിമാനത്താവളത്തിലുമുണ്ടായ ആക്രമണങ്ങളില്‍ ഇതിനോടകം മൂന്ന് പേർ കൊല്ലപ്പെടുകയും 36 പേർക്ക് പരിക്കേല്‍ക്കുകയും ചെയ്തിരുന്നു. ഹൂതികള്‍ തൊടുത്ത മിസൈല്‍ പതിച്ചതിനെ തുടർന്ന് സൗദി സിവില്‍ ഡിഫൻസ് സംഘം ഉടൻ തന്നെ സ്ഥലത്ത് രക്ഷാപ്രവർത്തനം നടത്തി. ആക്രമണങ്ങള്‍ക്ക് മറുപടിയായി യെമനിലെ 82 ഹൂതി സൈനിക കേന്ദ്രങ്ങള്‍ സഖ്യസേന തകർത്തു.
സൗദി അറേബ്യയിലെ നിലവിലെ സുരക്ഷാ സാഹചര്യങ്ങള്‍ കണക്കിലെടുത്ത് റിയാദിലെ ഇന്ത്യൻ എംബസി ഇന്ത്യൻ പൗരന്മാർക്ക് ജാഗ്രതാ നിർദേശം പുറപ്പെടുവിച്ചു. പൗരന്മാർ അതീവ ജാഗ്രത പാലിക്കുക. ആവശ്യമില്ലെങ്കില്‍ വീടുകളില്‍ തന്നെ തുടരുക. ഔദ്യോഗിക നിർദ്ദേശങ്ങള്‍ കർശനമായി പാലിക്കുക. സംഭവുമായി ബന്ധപ്പെട്ട ദൃശ്യങ്ങളോ വ്യാജ വാർത്തകളോ സമൂഹമാധ്യമങ്ങളില്‍ പങ്കുവെക്കരുതെന്ന് എംബസി കർശനമായി നിർദേശിച്ചു.
Leave a Reply