അർഹതയില്ലാത്ത റേഷൻ കാർഡുകൾ സറണ്ടർ ചെയ്യാൻ അവസരം

തൃശൂർ: അർഹത നഷ്ടപ്പെട്ടിട്ടും അനർഹമായി കൈവശം വച്ചിരിക്കുന്ന മുൻഗണനാ വിഭാഗം റേഷൻ കാർഡുകൾ സ്വമേധയാ സറണ്ടർ ചെയ്ത് പിഴയിൽനിന്ന് ഒഴിവാകുന്നതിന് സർക്കാർ സാവകാശം അനുവദിച്ചതായി ജില്ലാ സപ്ലൈ ഓഫീസർ അറിയിച്ചു. ഡിസംബർ എട്ടു വരെ അതത് താലൂക്ക് സപ്ലൈ ഓഫീസുകളിൽ കാർഡുകൾ സറണ്ടർ ചെയ്യാം.

സർക്കാർ/ അർധസർക്കാർ/ പൊതുമേഖലാ/ സഹകരണ സ്ഥാപന ജീവനക്കാർ, അധ്യാപകർ, സർവീസ് പെൻഷൻകാർ (പാർട്ട് ടൈം, താത്കാലിക ജീവനക്കാർ, ക്ലാസ് ഫോർ തസ്തികയിൽ പെൻഷനായവർ, 5,000 രൂപയിൽ താഴെ പെൻഷൻ വാങ്ങുന്നവർ, 10,000 രൂപയിൽ താഴെ സ്വാതന്ത്ര്യസമര പെൻഷൻ വാങ്ങുന്നവർ എന്നിവർ ഒഴികെ), ആദായനികുതി ഒടുക്കുന്നവർ, സ്വന്തമായി ഒരേക്കറിനു മേൽ ഭൂമിയുള്ളവർ (പട്ടികവർഗ ക്കാർ ഒഴികെ), ആയിരം ചതുരശ്ര അടിക്കുമേൽ വിസ്തീർണമുള്ള വീടോ ഫ്‌ലാറ്റോ ഉള്ളവർ, ഉപജീവന മാർഗമല്ലാത്ത നാല് ചക്രവാഹനം സ്വന്തമായുള്ളവർ, വിദേശത്തുനിന്നോ സ്വകാര്യ ജോലിയിൽ നിന്നോ പ്രതിമാസം 25,000 രൂപയിൽ അധികം വരുമാനമുള്ള കുടുംബാംഗങ്ങളുള്ളവർ തുടങ്ങിയവർ മുൻഗണനാ കാർഡുകൾ കൈവശം വച്ചിട്ടുണ്ടെങ്കിൽ നിർബന്ധമായും സറണ്ടർ ചെയ്യേണ്ടതാണെന്ന് ഡിഎസ്ഒ അറിയിച്ചു.