ചെറുതോണി: നേര്യമംഗലം – ഇടുക്കി സംസ്ഥാനപാതയോരത്ത് കരിമണൽ പൊലിസ് സ്‌റ്റേഷൻ പരിധിയിൽ പാംബ്ലയിൽ കത്തിക്കരിഞ്ഞ നിലയിൽ കണ്ടെത്തിയത് ബോഡിനായ്ക്കന്നൂർ പരമശിവം കോവിൽ സ്ട്രീറ്റിൽ നിത്യയുടെ (18) മൃതദേഹമാണെന്ന് പൊലിസ് തിരിച്ചറിഞ്ഞു. സംഭവത്തിൽ രാജാക്കാട് വട്ടപ്പാറ അംബേദ്കർ കോളനി സ്വദേശിയും ഓട്ടോ ഡ്രൈവറുമായ നിശാന്തിനെ (19) ഇന്നലെ കല്ലാർകുട്ടിയിൽ നിന്ന് പൊലിസ് കസ്റ്റഡിയിൽ എടുത്തു.
നിശാന്തും നിത്യയും മുന്നു വർഷമായി പ്രണയത്തിലായിരുന്നു. കഴിഞ്ഞ തിങ്കളാഴ്ച ഉച്ചയോടെ പെൺകുട്ടി നിശാന്തിനെ കാണാൻ പൂപ്പാറയിലെത്തുകയായിരുന്നു. നിശാന്തിന്റെ നിർദേശാനുസരണമായിരുന്നു പെൺകുട്ടി എത്തിയത്. വിവാഹക്കാര്യം സംസാരിക്കുന്നതിനിടെ വാക്കുതർക്കം ഉണ്ടാവുകയും പെൺകുട്ടിയെ കട്ടിംഗിൽ നിന്നും തള്ളിയിടുകയുമായിരുന്നു. പെൺകുട്ടിയുടെ മുഖത്ത് കല്ലിനിടിച്ച് പരിക്കേൽപ്പിച്ചു. തുടർന്നു മൊബൈൽ ഫോൺ ചാർജറിന്റെ കേബിൾ കഴുത്തിൽ മുറുക്കി ശ്വാസം മുട്ടിച്ച് കൊലപ്പെടുത്തുകയായിരുന്നു. മൃതദേഹം പ്രതിയുടെ ഓട്ടോയിൽ കയറ്റി പാംബ്ല വനമേഖലയിൽ എത്തിച്ചശേഷം പെട്രോൾ ഒഴിച്ച് കത്തിക്കുകയായിരുന്നു.
Leave a Reply